ذكريات
فدادين شطاره وألف فرصه وبنك حظ
والنصيب غلاب ومكتوب ع الجبين
حبات مطر ...أوراق شجر..
وكتاب موده بدون غلاف
بقراه تملّى فى السفر
مكتوب تكونى ذكريات
لحكايه من عشرين سنه
أطلال دموع متحجره على كل جفن
وألف تنهيدة أنين
مرت سنين
وعنيكى لسه بتتهمنى بالنداله والجنون
لكنى ما بعرفش أخون
ولا كانش تفرق لو تكونى أو أكون
كله إنتهى
ومش مهم تكونى انتى فى الصداره
أوأكون فى المنتهى
ولا مره حتى قلتها
البدايه بوسه كانت ع الجبين
كات بوسه عاميه وبعترت فيا السنين
ولما لمتها إنجرحت
مين فينا باع؟
مين فينا فضّل يرمى قلبه جوه احساس الضياع؟
مين فينا حاول لانصياع لهواه وغريزته؟
مين فينا حب ان الخيانه تبقى ميزته؟
مش هينطقها لسانى مش هااقولها
لحد تانى
انا كنت بحلملك قوى
وكنت برسملك ملامح كل عاقل او سوىّْ
كنت بجرح لجل أداوى
كنت عامل زى حاوى
بيبتسم وف قلبه جرح
كات عواطفى مالها حد
أيوه حبيتك بجد
لكن انتى بنيتى سد
خلّى بذر الشك يطرح
جوه قلبى ليل وبرد
صدقينى ما عادش مطرح
ليكى ولّا لأى حد
صدقينى البذره نالت من يقينى
حس قلبى بخوف وصد
وابتدى صوت السكات
حن قلبك للعناد
كان ضرورى اسيب مكانى
كان لابد ارحل لوحدى
وانزلك من فوق حصانى
واكمل المشوار وجع
ومش هوشوشلك ودع
كل شئ اصبح عدم
مش هينفعلك ندم
باقى كومة ذكريات
طلّى طله ع اللى فات
هتلاقينى مش أنانى
لمّا قررت الرحيل
والسبب هو ببساطه
ان حبك كان حقيقى
حب قاسى ومستحيل