بأمر الحب
علمني ازاي ارسم تقاطيع الفرح بالنور
وأفرشها علي الخدين
علمني ازاي أمسح تجاعيد الوجع
والأه وأمحيها من خطوط وشي
وناولني من معاك منديل
أنشف بيه بلل رمشي
علمني وبعدين أمشي
جايز في يوم تنبتلي ملامح فرح
ورديه محنيه بغمازتين
وقهقهتي تكون عاليه مدويه
تصير زلزال كذا ريختر
تهز الأرض تحتيه
وتخرج صافيه مرويه بترياق
السعاده الخام
وبالمره دموع الفرح   تيجي منين¿
وفين أصلاً مدامعها وفين بتصب¿
وعلمني كمان الحب
  بشرط يكون
رومانسي ع الطريقه البكر
وعرفني حدود الحيره فين والفكر
لأني مش بنام بالليل
وشيل عني شويه ويل
وخليني يوم انام سلطان
علي كفوف الفرح حتي
ولو بالكدب والكوسه  
وهاسمحلك لو تجيب بوسه
وعرفني لما يجي الفرح   أعمل ايه¿
وأقابله ازاي¿!
وفكرني ابتسم للجرح
وقول للراحه وللاحساس بالاطمئنان
حقيقي فات اوان الطرح
وخد ايدي تشيل وياك
شويه شوق وتنهيده
وكام كلمه تبل الريق وصدقني
هاروح وياك في اي   طريق
بدون ما اسأل
أكيد همك ما هوش أتقل
من الهم اللي فوق كتفي
ولا الشوك اللي هندوسه معاك
أقسي من المخفي في وريد القلب
وقوم يلُا عشان نلحق
ميعاد القطر من بدري
ونبدأ رحله النسيان