التنين الأحمر قام
جيش جيشه وعقد العزم
يغزو العالم بس بلئم
المرة دي منافسة شريفة
حتة قفزة إنما حريفة
أخرجها ولا أجدع فيلم
درس الفكرة دراسة عميقة
حسب الحسبة لكل دقيقة
مش جت فجأة ولا مباغتة
كله بيمشي حسب الخطة
لغاية كل أموره ما تتم
شغل صنع طور صدر
أتى عاليابس غرق لخضر
وبإيده العاملة عمل العملة
خلى العملة الخضرا ترن
الخطة وكانت وطنية
لعبوها لعبة محلية
قالوا هنقدر ويا عددنا
وبحبة صبر وإتقان
نتقدم ونعلي بلدنا
ونسابق أغنى البلدان
حطو قدمهم جوه الملعب
والسفارة قبل ما تضرب
هتف العالم "جوه الجون"
نط الكابتن فوق بحنون
راهن ورهانه كان صعب
اختار فوزه يحققه شعب
رسم الرسمه وهجم الهجمة
اللي مدوخ بيها الغرب
أجمل حاجة في التنين
إنه صاحب فكر ونية
بعد سنين وسنين وسنين
من صبر وجهد وتنظيم
قام صحى كل النايمين
والكلام لسه له بقية
اما أحنا فيا ليلي يا عين
نازلين لعب وهلس وتفانين
كلوا اتطور واحنا في الهيش عايشين
كله بيذوء وطالع عينه
وإحنا عالقاعدة مصرين
ليه نرضى بشغل التباع
ليه أغلى ما نملك ينباع
والكنز الاسود بياع
قومي افتحي مليون شراع
قبل ما تبقى بلادنا المرتع للأشياع
لاجل السلم ولاجل الحلم
ولاجل الهجمة ما تتحول لدفاع
الدنيا متكاملة يا أمة
وحدي صفك عدي الغمة
خلي العلم لليلك شمعة
وخلي في قلبك حبة رحمة
بالفتحة وبكسرة وضمة
وبعزة ونخوة وحبة همة
سددي ضربة فـ آخر جولة
ضربة يا أمة تكون القاضية
لمي عقولك ويا أقلامك
بالكلمة تحققي أحلامك
فاكرة يا أمة؟
فاكرة اللمة؟
طب مش فاكرة حتى النصرة
ولا إنت احتلتك الحسرة
وبرعتي في الخزى والكسرة
واستحليتي ضياع البصرة
وحطيتي التوقيع والبصمة
ورضيتي ببنود النصبة
ونسيتي في الزحمة الأزمة
كل عيوبنا لغيرنا ميزات
وبلادنا محتاجة عتاد
وإن كان عالزاد والزواد
فاحنا اللي بنصرف عالدنيا
ليه أموالنا رايحة لغيرنا
فين العلم وفين علماءنا
حبة في ناسا وحبة في ييل
وولادنا شايلين الويل
مش لنقيصة ولا لجهالة
إحنا عقولنا في أحسن حالة
بس الرك عـ النقالة
إللي في ناسنا نازلة تشيل
إللي بتنقل كل نبيه للانعاش
وإن كان أجله لسه مجاش
أو زمزء حبة ولا رضاش
يتمرمغ في تراب الميري
ويبيع أحلامه ببلاش
يتخانق مع ريس عاطل
نازل يقرا في الجرنال
عمال كده كده على بطال
ولما تراب الميري هيخلص
يجري يلحق في المتخصص
يمكن حلمه في يوم يرجعله
بعد الشهر الأول يفطس
وبعد الثاني يفك ويملص
وبعد نصايح كل معارفه
يجري في حضن الغرب ويغطس
أصل هناك الخوجة صياد
بيشمشم على عقل نضيف
لاجل ما يعلى بالمنطاد
وعلى أمجاده يضيف ويضيف
والراجل داخل دوامة
بين بلده و بلاد الصيد
ولما يحن لبلده يشوفها
تحرق قلبة بكل ظروفها
ومهما يجيبها يمين وشمال
مش هغير في الأحوال
مش هيشغل العاطلين
ولا يقاضي الفاسدانين
ولا يعقل المجانين
ولا يقعد الواقفين
ولا يفوق الدايخين
إحنا يا خلق الله عايزين
معجزة الواحد والعشرين
علشان نرجع بني آدمين!