قالوا وقلنا
وقلنا وقالوا

قلنا الحل إن احنا نطنش
كأن الواحد ولا علي باله

قلنا حقوق قالوا قانون
قلنا نفوق قالوا جنون
قلنا نعدل قالوا في إيه¿
قلنا في حالنا اللي إحنا عليه
قالوا قولو طلباتكم إيه¿
قلنا العيش
قالوا ريح نفسك
قمح مافيش

طب عايز أسكن

قالوا زايد ورحاب ومدينتي
قلت أنا عايز أعيش في" مدينبي"
قالوا ما هي تعبت زهقت
اطلعوا منها خلاص اتقفلت
قلنا ومين بس اللي خنقها
مين سارق روحها مدروخها
مين قفلها وبهدلها ووسخها
قالو الزحمه
قلنا الرحمه
قالوا طب إبنوا بيوتكو بإيدكو
قلنا ومالو
رحت أنا   أبني وغيري كتير
واقفين والطوابير طوابير
قلت الخير ده بينه كتير
واستنيت أدوار وأدوار
والصبر يا أبويا جبار
ولما أنا جيت أبني وأعلي
لقيت اللي نصحني وقاللي
بلاها بلاهه
وارجع أحسن
لأنت هتبني ولا هتعلي
أمال ايه الموال ده يا سيدنا
ده حكايه وحبالها طويله
دوبها أمر الكباره
والفاتح درجه أبو نضاره
والكوسه يا معلم غليت
روح ارجع أحسن للحاره
لحسن لما عيارك يفلت
تعلق تشبك في السناره
ويشدوك هيلا بيلا عالبورش
والباقي عليك فكر فيه
مش هحكيلك لسه عليه

طب نتعلم

ضحكوا وقالوا الله الله
عايز تتعلم يا حلاوه
وهتفهم والروس تتساوي¿
عايز تتنور يا حليله
وتناطح تعمل هليله
عايز تزرع
ولا تصنع
ولا تصوت تحت القبه
وتطالب بحقوق لعباد
أو تتبني أراء شيوعيه
وتسيب المجانين في نعيمهم
ولاتقول شي لله يا جيفارا
تتمرد أو تعمل حاله
أو تختارلك   المهاتير
تمشي علي دربه وتسير
تعمل تنميه وتطوير
أو تتكلم عن أمجادنا
بجد بحق مش تهليل
أو تفهم دينك وتطبق
ومصيبه ليطلعلك مبدأ
وتفكر وتقلب راسك
إذاي ممكن تعزأ أرضك
إذاي ترجع تمسك فاسك
إذاي قمحك يبقي لناسك
والقطن اللي أبو تيله طويله
يرجع من تاني يا حليله
ولا تحل الأزمه يا سيدنا
وتسد الدين اللي علينا
حقه ساعتها أعملك مولد
والكل علي حسابي معزوم
لو تقدر من وسط ده كله
تطلع لي بكلام مفهوم
أو تقدر تبدع أو تكتب
وتقول بئه كل اللي في نفسك
وتحاول تصلح وتعلم
ولا تفوق في المتبلم

أتحداك تلغي الواسطه
أو تقطع للفاسد دابر
إلافي حلم اليقظه شريد
أوتمحي "أنانيه" نفسك
أوتنزع روحك من يأسك
مهما حاولت صبرت عاندت
هترجع تاني وبالتأكيد

وممكن برده تبقي عميل
لينا علينا مع   إسرائيل
ولا حرامي خبره أراري
بتسيب بلدك لأجل القرش
كل كلامك قال وأنا مالي
الله يجازي ولاد القرش

شوف يا بني هجبلك مالأخر
اللي ذاكر ما خلاص ذاكر
حرب وسعد وكامل راحوا
ونشيدنا لحنه درويش
والوطنيه والقوميه
والوحده التايهه العربيه
قالوا خلاص بخ مافيش

فما تعملش صلاح الدين
عكا اتباعت
وفي خيرها الخاينين عايشين
أما زويل يعقوب والباز
و كل كلامنا عن الإنجاز
فى ده كله ياغالي
كاموفلاج
قال الباز الصحرا كبيره
ممكن تبقي جنه خطيره
بالبحث العلمي المتطور
والعقل العربي المتنور
وزويل قال وزويل ما هوفاهم
المستقبل للي يساهم
مش للي مسفر مش فاهم

وأما تحس إن إنت لوحدك
قوم هتزعأ أو هتنادي
يا أهل أمون بالفرعوني
كفياكو عيشه هميوني
يا كنانه ويا هبه النيل
اصحي وقومي كفايه تغفيل

يا طه ونجيب   وجاهين
يا مصاحبه النغمه عالدواوين
ليه كل ما فيكي بكي وعويل
ليه صوت كروانك حتي أنين

طيب مأنتم أهوه عارفين
أمال عيبنا يا خلق في مين¿
أه عارفين
بس الحال مش بأيدينا
ولا   عارفينه بأيد مين
بس أنا مطعم إحساس
لاتقولي لا تيتانوس ولا خنزير
الفرق ما بينهم فرق كبير

قلنا كرامه

قالو بلا خيبه   بلا ندامه
ده أحنا في قلب الدوامه
لاتقولي لا نخوه ولاشهامه
ولا سينما ومسرح ودراما
فكرك يعني أنا مبسوط
أنا ماشي زيك بالنبوت
مفروس مضغوط مقهور مكبوت
بس كفايه الله لا يسيئك
وبلاها لت   الدساتير
شفافيه مساءله وتشريع
واللي هيلحق يجري يبيع
كله موافق كله بأمره
واللي هيفتح بقه يضيع

قبل طوفان التغيير فلسع
الحق نفسك قبل ما تلسع
أسكت خالص لما أتكلم
واسمع بقه لاجل ما تتعلم
بص لنفسك
إسأل نفسك
مالك ساكت¿
ولا سكاتك حل عجيب
للتهريب والتهليب
ولا لأزمه الأنانبيب

بيب بيب بيب بيب
إحنا أبطال أفريقيا يا عالم
بوصوا وشوف هنعمل إيه

بيب بيب بيب بيب
كله يصرخ كله يهيص
إشهدي ياله علينا يا دنيا
إحنا اللي بدعنا التهجيص

بيب بيب بيب بيب
بس اكتم صوتك يا زعيمنا
لحسن بينه الجاي بوليس
حقه يا أخويا بينه بوليس
يا نهار أبيض
يا نهار كحلي
بس يا عم   أوام نزلني
وإعمل نفسك ولا تعرفني
ولا يقدر في الزحمه يطلني

أنا دبت ودابت أيامي
والهم أنا شايله في أحلامي
أنا راكب فرسي ولجامي
متكتف بقانون سجاني
والدنيا ماهياش سيعاني
مش مالفرحه
من أحزاني لأني بعاني
مالحزن بغني وبنكت
ولا عدت بعاتب ولا اعتت
وأنا مالي بكل الي بيحصل
في الأخر ما أنا هطلع "تيت"

أدي كلامك
داير جوه بنات أفكارك
مش بالذمه طلعت أنا فهمك
أكتر من روحك من نفسك
طب إيه قولك
بعد ده كله¿
لسه بتحلم¿
لسه بتفهم¿
لسه عند ثبات المبدأ¿

بكره تجيلي
ونرجع مالأول نبدأ
نفس القصه
نفس الغصه في صوتك
وإنت عايز حقك
وأنا برده هعيدلك وهقولك
شوف يا بني هجبلك مالأخر
بلدي دي غاليه عليك وعليا
واللي هممني ومجنني
إنك لسه ناوي تغير
بعد ده كله مصر تغير!
والله يمكن
يمكن تقدر
بس ساعتها هكون أنا فين¿
والله أكيد هكون أنا ميت
ابقي إدعيلي
معاك بعدين
وافتكر إني نصحتك
بس لأني أنا شفت في عينك
لمعه
لمعه ذكيه ودمعه أبيه
بتفكرني بنفسي زمان
لما أنا كنت زمان إنسان

إمشي وروح لاهلك يا بني
طيب وإنت¿

كتر الخوف ما هو نشف دمي
خلاني قاسي خلاني ناسي
انهي في دوله ظلمي عدوي
يالا ما تمشي
إيه مستني¿

أنا مسخ في حواديت أمريكا
وشبح رسموه عالحيطه
ومجرد دميه بتتحرك
بصوابع واعيه وحويطه

وزمان كان نفسي أفوق نفسي
وأنصح كل أصحابي وأهلي
ولا أطبق إللي درسته في الميكانيكا
وأنضف   شكمان ضمايرهم
بس هنعمل إيه في مطامعهم

بلا تنميه بلا تجديد
بلا لخمه ولبخه وبولوتيكا
فكك من كام مبدأ فاضي
وماتعملش علينا القاضي
وبلاها حمقه وتشنيجه
ولو مش عجبك
إخبط راسك فى اتخن حيطه

إقنع وإرضي
وحط الكاتشب عالمسترده
واضرب ويكا
سيب الفكر لناسه بقولك
وأملي دماغك بالمزيكا

إحنا اخترنا الدور الأرضي
بوضع اليد
والوضع المتدني ده نعمه
ومش بيخض
تبت جامد وإمسك فيه

حيلك حيلك بس يا حضرت
حتي الذل عايزني أحبه
وأتبت وأمسك قال أنا فيه¿

ما أحنا في خيره أهوه عايشين
مستر سوكا وميس كمبوكه
بيمنو علينا بملايين
بالمنحه   إللي لولاها يا باشا
كنا فطسنا وكنا فقسنا
وكنا زمنا قتلنا عيالنا!

طيب إقرا عن البلدان
عن مصالحها
عن مذابحها
عن صراعتها
علي اللأطيان
عن تسخيرها للغلبان
من أول خلق الإنسان

وسع عينك بس شويه
وإرجع   إقفل عينك تاني
كتر الفرجه وجعلي عينيه
ما أنا من يومها مشفتش تاني
دخت شويه لما عرفت
بس أنا فايق أهوه قدامك
ذي الفل
والعيشه أحلي من اللازم
بص وطل
شفت الخلق سعيده إذاي
ركز حبه جوا الكدر
صور مصر في عز الفجر
شفت الدنيا جميله   إذاي

إنت مبالغ والله كتير
وعايزلك حبه تخدير
عايز تاكل قمح بخيره¿
عايز عيش من غير مسامير¿!!!!
عايز تسكن كده ببلاش¿
لأ وبكيفك بلا تهجير!
عايز بحث وعلم وخبره
وعقول ناضجه وفاهمه وعارفه
وقلوب صافيه
ده حلم جميل

إصحي يا حلو
يا عم يوتوبيا
وتعالي
أنا عازمك علي لوبيا
ولا تفضل تاكل باميه
خلي الجوده بالموجوده
واسكت ثانيه
اتأمل دنيا
غير الدنيا
وقول يا كريم!