بحبــك يا بلدي يا أم الزراعة يا ام الحضارة يا أم الصناعة

بحبــك يا بلدي بصدق وحرارة لأنك بنيتي أصول الحضارة

زرعتي الصحاري ونيلك مجاري علي أرض توشكي بتبكي الزراعه

بحبك يا بلدي يا أم الصناعـــه غلبتـي اليابانــي بفــن ومهـــاره

وصيني وماليزي وهندي وباريسي وخيرك ملانا بربح التجارة

فلوسنا كتيرة ما أحلي الحصيره دا ريش النعام يجـيب الــمرارة

وأطفال شوارع بتبني البيوت ومات التسـول... بحسن الإدارة.!

كفايا بأنـك نهـيــت البطالــه وكــــل الشوارع مـا تعرف زبـالــه

بلاش صرف صحي وحوادث طريق وتعليم وصحه نجحنا بجداره

وكل اللي قلته أكيد مش نفاق ومين اللي يصدق يا ألفين خساره..!

وقــولــوا معايا يعيش النظـــام ويكـتــم نفسنـا ليــوم القيامــه

من ديوان /أحلام شاعر

محمدأحمد الغندور محمد

ابن النيل

الزقازيق