قبل القول .. سلامات وعوافي
على ريسنا وع اللي مصحصح
وكمان ع اللي اتمدد حافي
................
ليه الاستجواب للداخلية ؟!
والله ده شغلها مية لمية
وقبل ما حد يقول نتاش
يقول بكاش ..
اسمعوا مني القصة دهيه
................
كانت البنت الحلوة نزاجة
تطلع تنشر أيها حاجة
تلقاني واقف ليها أبصبص
من شباكي أقعد أتبصص
................
لما راجلها علم بالقصة
بقى يطلع هوه اللي ينشر
شفتوا يا خلق الناس الناقصة
ده بخلقته عمري ما بأستبشر
...............
رحت شكيت للبيه المأمور
قاللي بنفسي راح أطلع أعاين
راجل عترة وابن أصول
بيه الحق راح يكون باين
................
ظهر الراجل ..
بان بغسيله
شافه المأمور غمض عينه
أمره يغور ويطلع مرته
تطلع تنشر بيني وبينه
................
هل هلال الحلوة نزاجة
جت وجمالها يفوق العادة
شافها المأمور بحلق بلم
قاللها مصر صحيح ولادة
................
بعدين قال للمدعوء جوزها
راح أقول كلمة وهتنفذها
مرتك تنشر على كيف كيفها
وإياك يوم واحد تناكفها
................
ولجل البيه المأمور يطمن
إن الأمر راح يكون ساري
من نهاريها وهو مآنس
لابد على طول في الدار جاري
لما تهل عليه يتنهد
لما تغيب جعورته تلالي
...............
شفتوا يا ناس شغل الداخلية ؟
والله ده شغلها مية لمية
استجواب إيه وإحاطة إيه ؟!
سيبكوا يا ناس م الشورة دهية